每次出街買嘢前，你有冇諗清楚，呢樣嘢真係生活所需，定只係一時衝動？諗多一分鐘，可能幫你慳番唔少錢。同時了解理財過程中常見的7大誤區，學習如何避免呢啲錯誤，提升你嘅財務健康。
1. 無理財計劃
理財第一步，就係要知道自己啲錢用咗去邊。屋企開支、生活費、租金、保險同娛樂開銷，最好事先有個分配計劃。好似租金唔好超過人工三分一，生活費同保險加埋都唔好超出預算。排個優先次序，可以幫你清楚掌握開支，容易控制消費，仲有利日後做長遠財務規劃。
2. 唔記帳
好多打工仔每到月尾先發現戶口清晒，其實每日花五分鐘記帳，已經可以大大改善理財狀況。你可能會發現有啲開支原來可以慳，例如：每月交健身費但好少去、日日飲咖啡、係咪都搭的士。依家有咁多記帳App，用手機記錄支出，簡單又方便。
3. 無清晰儲蓄目標
無目標儲錢，好難堅持落去。如果有清楚目標，例如儲首期或者10年後去環遊世界，存錢就會有動力好多。每個人生階段目標唔同，越早開始，對你人生都有幫助。
4. 投資唔做功課
想靠投資賺錢，一定要做足功課。投資唔係靠運氣，係靠知識。如果唔熟悉投資工具，可以搵專業人士幫手，唔好亂嚟。
5. 信用卡用過火
依家電子支付咁方便，又快又直接，信用卡愈用愈順手，就好容易衝動買嘢。如果你經常「幫襯」，每個月數目都幾驚人。信用卡其實係預支未來錢，唔係免費嘅午餐。如果只還最低還款額（min pay），利息會愈滾愈多，卡數只會愈還愈多，最後搞到信用評分受損。
所以未清卡數之前，盡量唔好再用卡。如有能力，每個月都要盡量還清，減少利息負擔。
6. 低估自己壽命
唔少50歲以上人士會趁收入高峰期加快儲錢，為退休做準備，但亦要記住，年紀愈大，錯一鋪可能影響好大。記得及早考慮醫療、社會福利同退休金計劃，逐步調整投資風險，減少臨老手忙腳亂。
7. 忽略緊急儲備金
有啲打工仔覺得退休好遠，唔急住儲錢，結果緊急情況一到就無後著。好多年輕人根本無緊急基金。呢筆錢可以幫你應付突如其來嘅困境，例如突發病痛或者突然失業，保障自己無後顧之憂。
理財冇捷徑，但識得避開常見錯誤，就等於向財務自由行前一步。
Email: advertising@jobmarket.com.hk
Email: enquiry@jobmarket.com.hk
